អាស៊ី៖ អត្តពលិករុស្សី និងបេឡារុស្ស អាចនឹងចូលរួមការប្រកួតក្នុងព្រឹត្តិការណ៍កម្រតអាស៊ី ខណៈដែលគណៈកម្មាធិការអូឡាំពិកអន្តរជាតិ (IOC) កំពុងស្វែងរកជម្រើសដែលអាចនាំយកអត្តពលិកនៃបណ្តាប្រទេសទាំងពីរនេះចូលរួមការប្រកួតព្រឹត្តិការណ៍កីឡានានាឡើងវិញបាន។
គណៈកម្មាធិការអូឡាំពិកអន្តរជាតិបានបញ្ជាក់កាលពីពេលថ្មីៗនេះថា គណកម្មាធិការអូឡាំពិកអាស៊ី (OCA) បានផ្តល់ការអនុញ្ញាតប្រសិនបើអត្តពលិកនៃប្រទេសរុស្សី និងបេឡារុស្ស ចង់ចូលរួមការប្រកួតកីឡានានាដែលរៀបចំឡើងក្នុងកម្រិតទ្វីបអាស៊ី ខណៈគណៈកម្មាធិការអូឡាំពិកអន្តរជាតិ (IOC) បានសម្តែងការស្វាគមន៍ និងកោតសរសើរចំពោះសេចក្តីសម្រេចរបស់ស្ថាប័នកីឡាដ៏ធំរបស់អាស៊ីមួយនេះ។
ការអនុញ្ញាតនេះក៏អាចរួមបញ្ចូលព្រឹត្តិការណ៍ប្រកួតជម្រុះអូឡាំពិកផងដែរ ដោយសារអត្តពលិករុស្ស៊ី និងបេឡារុស្ស មិនអាចចូលរួមប្រកួតនៅជាមួយអូឡាំពិកអឺរ៉ុបបាន ដែលជាផ្នែកមួយនៃការរឹតបន្តឹង និងការហាមឃាត់ផ្សេងៗ ក៏ដូចជាកាយវិការប្រឆាំងមួយដែលបណ្តាលមកពីការឈ្លានពានរបស់រុស្ស៊ីលើអ៊ុយក្រែន។ IOC ក៏មានបំណងក្នុងការដាក់បញ្ចូលអត្តពលិករុស្ស៊ី និងបេឡារុស្សជាអត្តពលិកអព្យាក្រឹតនៅក្នុងព្រឹត្តិការណ៍កីឡាអូឡាំពិក ទីក្រុងប៉ារីស ឆ្នាំ២០២៤ ផងដែរ ដែលមានន័យថាជាអត្តពលិកមកពីរុស្សី និងបេឡារុស្សនឹងប្រកួតប្រជែងក្រោមទង់អូឡាំពិក ប៉ុន្តែវានៅតែមិនទាន់ច្បាស់ថាតើពួកគេអាចមានលក្ខណៈគ្រប់គ្រាន់ក្នុងការឆ្លងផុតវគ្គជម្រុះបាន ឬក៏ដោយរបៀបណា។
ចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងខែកុម្ភៈ ស្ថាប័នកីឡាជាច្រើនបានផ្លាស់ប្តូរព្រឹត្តិការណ៍របស់ខ្លួនចេញពីរុស្សី និងផ្អាកក្រុម ក៏ដូចជាអត្តពលិករុស្ស៊ីពីព្រឹត្តិការណ៍ប្រកួត ខណៈដែលអ្នកក្រុមហ៊ុនអ្នកឧបត្ថម្ភនានាក៏បានបញ្ចប់កិច្ចសន្យារបស់ខ្លួនជាមួយរុស្សី ដែលជាផ្នែកមួយក្នុងការតវ៉ាប្រឆាំងនឹងសង្គ្រាមដែលកំពុងកើតមានឡើង។
កន្លងមក IOC បានផ្តល់អនុសាសន៍ថាព្រឹត្តិការណ៍កីឡាទាំងឡាយដែលគ្រោងធ្វើឡើងនៅក្នុងប្រទេសរុស្ស៊ីនឹងត្រូវបានលុបចោល ឬផ្លាស់ប្តូរទីតាំងផ្សេង ហើយបន្ថែមថាអត្តពលិករុស្ស៊ី ព្រមទាំងបេឡារុស្សនឹងមិនត្រូវអនុញ្ញាតឱ្យចូលរួមការប្រកួតឡើយ ឬពុំនោះទេពួកគេអាចចូលរួមប្រកួតប្រជែងបាន ប៉ុន្តែត្រូវបង្ហាញខ្លួនក្រោមទង់អព្យាក្រឹតរបស់អូឡាំពិក៕
